யாழ் முஸ்லிம் ஒன்றுகூடல் - ஐயங்களுக்கு தெளிவு

அஷ்-ஷெய்க் அய்யூப் அஸ்மின் (நளீமி)

யாழ்ப்பாணம் முஸ்லிம் ஒன்றுகூடல் இம்முறை 2012 பெப்ரவரி 4,5,6,7ம் திகதிகளில் யாழ்ப்பாணம் முஸ்லிம் வட்டாரத்தை மையப்படுத்தி யாழ்,கிளிநொச்சி முஸ்லிம் சம்மேளனத்தினால் ஏற்பாடு செய்யப்பட்டுள்ளது. இந்நிகழ்வையொட்டி பல்வேறு விமர்சனங்களும் கருத்தாடல்களும் பரவலாக எம்மவர் மத்தியில் உலா வருகின்றது, ஒரு சிலர் இதனை எம்மவர்கள் வருடா வருடம் கொண்டாடும் “கொண்டாட்டத்துடன்” ஒப்பீடு செய்கின்றார்கள், இன்னும் சிலர் “வெள்ளைக்கடற்கரை கொடியேற்றம்” என அடையளம் செய்கின்றார்கள்,

இன்னொரு புறத்தில் இது வீண் விரயம் என சொல்லப்படுகின்றது, இப்படியாக இந்நிகழ்வை பலரும் பல்வேறு கோணங்களில் நோக்குகின்றார்கள், ஆனால் இதன் ஏற்பாட்டாளர்களிடையே இந்நிகழ்வு குறித்து முற்றிலும் மாறுபட்ட கருத்தே நிலவுகின்றது. அதனை இங்கே அடையாளப்படுத்துவதே இந்த ஆக்கத்தின் நோக்கமாகும்.


1990 வெளியேற்றம் புலிகளின் திட்டமிடப்பட்ட இனச்சுத்திகரிப்பு நடவடிக்கை என்பதில் எல்லோருக்கும் உடன்பாடு இருக்கின்றது, அதே போன்று இன்றுவரை தனித் தமிழ்த் தேசியவாத எண்ணக்கருவில் தீவிரம் கொண்ட பலரது நிலைப்பாடும் யாழ்ப்பாணத்தில் முஸ்லிம்கள் வசிக்கக்கூடாது என்பதாகும்.


இதற்கு சான்றாக கடந்த ஜனவரி 06ம் நாள் பீ.பீ.ஸீ தமிழோசையில் வெளியான நிர்மலா ராஜசிங்கம் அவர்களுடைய “தமிழர்கள் முஸ்லிம்களையும் அரவணைத்துச் செல்லவேண்டும்” என்ற அறிக்கை மீதான செவ்வியும் அதனைத்தொடர்ந்த கலந்துரையாடல்களும் முஸ்லிம்களின் மீது இன்னமும் காழ்ப்புணர்வு கொண்டுள்ள தமிழ்த் தீவிரவாதத்தை உணர்த்தி நிற்கின்றன.


மறுபக்கத்தில் அரசாங்கம் மீள்குடியேற்ற நடவடிக்கைகளை இன்னும் ஓரிருவருடங்களுக்குள் முடிவுக்குக் கொண்டுவர தீர்மானித்துள்ளது, அதே போன்று யாழ்ப்பாணத்தில் முஸ்லிம்கள் மீளவும் குடியேற வேண்டும் என்பதில் சாதகமான நிலைப்பாடுகளைக் கொண்டுள்ள பல தமிழ் அரசியல் சமூகத் தலைமைகளும் இப்போது அவர்களது ஆதரவுக் கரங்களை முஸ்லிம்களை நோக்கி நீட்டியுள்ளனர், தேசிய சர்வதேசிய மட்டத்தில் யுத்த முடிவைத் தொடர்ந்த மீள்குடியேற்றம், யுத்தப் பிரதேசங்களுக்கான அபிவிருத்தி என்பன சாதகாமாக நோக்கப்படுகின்றன. எனவே இவ்வாறான சாதகமான சூழல் முடிவுக்கு வருவதற்கு முன்னமே யாழ்ப்பாண முஸ்லிம்களின் மீள்குடியேற்றத்தின் கணிசமான பகுதிகள் நிறைவேற்றப்பட வேண்டும் என்பது எமது அபிப்பராயமாகும்.

யாழ்ப்பாண முஸ்லிம் சமூகத்தின் மீள்குடியேற்றம் தொடர்பில் இருவகையான பிரிவினரை நாம் காணுகின்றோம், ஒன்று மீளக்குடியேற்றத்தக்க யாழ்ப்பாண சமூகம் (அகச்சமூகம்) அடுத்து மீள்குடியேற்றத்துக்கு ஒத்துழைக்கும் வெளிச்சமூகம் (புறச்சமூகம்). தற்போது யாழ்ப்பாண முஸ்லிம் மீள்குடியேற்றத்தின் அகச்சமூகத்தை எடுத்துக்கொண்டால் அங்கே; எதிர்மறையான சிந்தனைகள், சமூகப் போட்டாபோட்டிகள், சுயநல அரசியல் இலக்குகள், அறியாமை, சுய விருப்புகள் கொண்டு மிகவும் கொச்சைப்படுத்தப்பட்ட அமைப்பில் மக்களுக்கு காட்டப்படுகின்றன.


எனவே மீளக்குடியேற விரும்பும் ஒருவன் எந்த நம்பிக்கையுடன் மீளவும் குடியேறுவான், அத்தோடு கடந்த 20 வருடங்களாக யாழ்ப்பாண முஸ்லிம்களை வங்குரோத்துக்காரர்களைப் போல நடாத்தும் சமூகத்தலைமைகள் அவர்களுக்கு ஏதாவது கொடுத்தால்தான் வருவார்கள் சாதாரணமாக அவர்களாகவே முன்வந்து எதனையும் செய்துவிடமாட்டார்கள் என்ற நடைமுறையினைத் தாரளாமாக ஏற்படுத்தி விட்டிருக்கின்றார்கள், இதன் தாக்கம் தற்போதைய மீள்குடியேற்ற செயற்பாட்டிலும் அதிகமாக காணப்படுகின்றது.


எனவே மீளக்குடியேறவுள்ள சமூகத்திற்கு முதன்மையாக மீள்குடியேற்றம் குறித்த விளக்கங்களும் தெளிவுகளும் நம்பிக்கைகளும் வழங்கப்படவேண்டிய தேவை இருக்கின்றது, “மீள்குடியேற்றம் சார்ந்த சிந்தனைகளும் திட்டங்களும் யாழ்ப்பாண முஸ்லிம்களிடம் பரவலாக்கப்பட வேண்டும்”. இதற்கான ஒரு முயற்சியே “யாழ் முஸ்லிம் ஒன்றுகூடல்” எனவே இந்த நிகழ்வானது ஒரு தனிப்பட்ட குழுவின் முயற்சியல்ல மாறாக சமூகத்தின் எல்லா அங்கங்களும் பங்கேற்கும் ஒரு சமூக நிகழ்வாகும். எனவேதான் இதற்கான தலைமைத்துவத்தை யாழ் கிளிநொச்சி முஸ்லிம் சம்மேளனம் ஏற்றுள்ளது.


ஒரு சமூகத்தில் பல்வேறு விருப்பு வெறுப்புடையவர்கள் இருப்பார்கள், அவர்களின் விருப்புகளுக்கு மார்க்கத்தின் வரம்புகளுக்குள் நின்று அனுமதியளிப்பதும் அவர்களை நெறிப்படுத்தி வழிகாட்டுவதும் எமது கடப்பாடாக இருக்கின்றது. எல்லோரையும் அங்கீகரிக்கின்ற மனோநிலையும் அவர்களை ஏற்றுக்கொண்டு அவர்களால் சமூகத்திற்கு கிடைக்கும் நன்மைகள் ஒழுங்குற சமூகத்தை அடையச்செய்வதும் எம் ஒவ்வொருவரினதும் கட்டாயக் கடமையாகும்.


இவ்வாறான ஒரு பரந்துபட்ட நோக்குடன்தான் “யாழ் முஸ்லிம் ஒன்று கூடல்” நோக்கப்பட வேன்டும். வர்ண டியூப் லைட்டுகள், இலவச உணவு விநியோகம், பகலும் இரவும் முழங்கும் ஒலிபெருக்கிகள் எம்மவர்களுக்கு மீண்டும் சோனகர் தெருவின் வாழ்வை மீட்டிப்பார்க்கவும், அதன் மீது ஆசையையும் ஆர்வத்தையும் உண்டு பண்ணவும் உதவும் என்பது எமது நம்பிக்கை. அதனால் தானும் மீளவும் குடியேற வேண்டும் என்ற நம்பிக்கை அவனுள் தோன்றும் என்பது எமது நம்பிக்கை. இன்னொரு வார்த்தையில் சொன்னால் “மீள்குடியேற்ற செயற்திட்டத்தை மக்களுக்கு தெளிவு படுத்தி அவர்களுக்கு மீள்குடியேற்றத்தின் மீதான ஆர்வத்தையுண்டு பண்ணுவதே“ எமது பிரதான இலக்காகும். எனவே இந்த இலக்கை 100 வீதம் அல்லாவிட்டாலும் கணிசமான அளவிற்கு அடையமுடியும் என்பது எமது நம்பிக்கை.


அந்த வகையில் பெப்ரவரி 04ம் நாள் முதல் 07ம் நாள் வரை பல்வேறு நிகழ்சிகள் ஏற்பாடு செய்யப்பட்டுள்ளன.


1- மீள்குடியேற்றம் தொடர்பான விஷேட கலந்துரையாடல்கள்
2- இஸ்லாமிய சமூக அமைப்பு தொடர்பிலான விஷேட சொற்பொழிவுகள்
3- முஸ்லிம் சிறார்களுக்கான விஷேட இஸ்லாமியப் போட்டி நிகழ்ச்சிகள்
4- வாலிபர்களுக்கான விளையாட்டுப் போட்டி நிகழ்ச்சிகள்
5- அரச அதிகாரிகள் சகோதர சமூகத்தவர்களுக்கான விசேட ஒன்று கூடல்
6- முஸ்லிம் சமூகத்திற்கான பொதுக் கூட்டம்


இதுபோன்ற பல்வேறு நிகழ்ச்சித்திட்டங்கள் இம்முறை ஒன்று கூடல் நிகழ்வை அலங்கரிக்க இருக்கின்றன.


இங்கே பலரது கவனத்தை ஈர்த்திருப்பது குறிப்பிட்ட நாட்களில் மீலாத் விடுமுறையும் உள்ளடக்கப்பட்டிருப்பதுதான், அது உண்மைதான். மீலாத் திகதிகளில் எமது நிகழ்வுகள் ஏற்பாடு செய்யப்பட்டமை உண்மையில் மீலாத் நிகழ்வை மையப்படுத்தியதானதல்ல. மீலாத் நிகழ்வு என எதுவும் அங்கே இருக்கப்போவதிலை, அவ்வாறு ஏதேனும் ஏற்படுத்தப்படுமானல் அதற்கு நாம் உடந்தையானவர்களுமல்ல.


மாற்றமாக நீண்ட விடுமுறைகளும் பலருக்கு நிகழ்வுகளில் பங்கேற்கும் வாய்ப்புக்கிட்டுவதுமே குறித்த திகதிகளை நாம் தெரிவுசெய்யக் காரணமாகும்.. எனவே இத்தகைய சாதகமான பல்வேறு அம்சங்களை இவ்வொன்று கூடல் நிகழ்வு தன்னகத்தே கொண்டிருக்கின்றது.


மேலும் இது ஒரு சமூக செயற்பாடாகும், யாழ் முஸ்லிம் சமூகத்தில் அக்கறையுள்ள ஒவ்வொருவரும் இதில் பங்காளிகளே யாரையும் நாம் தூரத்தே வைத்துப்பார்க்க விரும்பவில்லை, எல்லோரது கருத்துக்களையும் அங்கீகரிக்கின்ற முடியுமானவரை அவற்றை நடைமுறைப்படுத்த முயற்சிக்கின்றோம். எனவே எவ்வித தயக்கமும் இன்றி தங்களது மேலான கருத்துக்களை நேரடியாக எமக்குத் தெரியப்படுத்துங்கள். அவை எம்மால் சாதகமாகப் பரிசீலிக்கப்படும்.


யாழ்ப்பாண முஸ்லிம் சமூகத்தின் மீள்குடியேற்ற செயற்திட்டம் வெற்றிபெற நாம் அனைவரும் முயற்சிப்போம் ஒத்துழைப்போம் இறையருள் வேண்டிப் பிரார்த்திப்போம்..!!